Стала вядома, як каліновец Андрэй Сяргееў мог вярнуцца ў Беларусь
Андрэй Сяргееў / АНТ
Добраахвотнік-каліновец Андрэй Сяргееў, асуджаны ў Беларусі, меў сур'ёзныя праблемы са здароўем і паехаў на радзіму рабіць аперацыю. Там яму выдалілі адно лёгкае, піша "Наша Ніва".
Некалькі дзён таму дзяржпрапаганда паказала тэлесюжэт пра асуджаных у Беларусі добраахвотнікаў палка Каліноўскага. Былі паказаныя Васіль Верамейчык і Максім Ралько, пра якіх было вядома раней. Таксама прапагандысты паказалі Андрэя Сяргеева, пра затрыманне якога раней звестак не было.
Былы каліновец Аляксандр "Кусь" Клачко расказаў, што ў Сяргеева быў пазыўны "Кот". У 2022-м пайшоў добраахвотнікам абараняць Украіну. Клачко кажа, што Сяргееў дэмабілізаваўся па стане здароўя: верагодна, паўплываў каранавірус.
Потым яны бачыліся ў верасні 2022-га. "Тады я даведаўся, чаму быў вельмі здзіўлены, што ў "Ката" былі сур'ёзныя праблемы з лёгкімі. І ён ад бязвыхаднасці з'ездзіў у Беларусь, дзе яму зрабілі аперацыю і выдалілі адно лёгкае. Пасля той сустрэчы я больш пра яго не чуў", — згадвае каліновец.
Ён дадае, што Сяргееў моцна рызыкаваў, паехаўшы ў Беларусь, бо на той час у тэлеграм-канале "Баста" ўжо з'явілася фота добраахвотнікаў на вакзале Львова перад адпраўкай на навучанне.
