Ажыятажнага попыту на бензін няма, а чэргі звязаныя з расіянамі — "Беларуснафта"

На складах кампаніі "Беларуснафта" аўтамабільнае паліва ёсць у дастатковай колькасці, а чэргі на запраўках звязаныя з сезонам і прыездам расіян. Пра гэта ў эфіры дзяржаўнага тэлеканала СТБ расказаў прадстаўнік "Беларуснафты" Валерый Атрошчанка.

Ён заявіў, што паліва на заправачных станцыях і на складах захоўвання ёсць у дастатковай колькасці, бо "ўсе заяўкі ад нафтаперапрацоўчых заводаў выконваюцца згодна з графікам".

Да росту чэргаў на запраўках кампанія, паводле Атрошчанкі, гатовая, абмежаванні ўводзіць не плануецца:

"Дзе на пэўных заправачных станцыях узрастае аб'ём спажывання, адпаведна, завозіцца своечасова паліва на гэтыя аб'екты, каб забяспечыць бесперабойнае забеспячэнне палівам нашых кліентаў. Шмат прыязджае суседзяў у нашу краіну, у тым ліку і на заправачныя станцыі. На сённяшні дзень ніякіх абмежаванняў, ніякіх лімітаў на прыгранічных заправачных станцыях або іншых аб'ектах няма. Сёння паліва ў вольным доступе ў неабходнай колькасці".

Пры гэтым ён прызнаў, што на некаторыя віды нафтапрадуктаў узнікае попыт, але, маўляў, кантраляваны.

У чэрвені ў Расіі пачаўся бензінавы крызіс, выкліканы ўкраінскімі атакамі па нафтаперапрацоўчых заводах. За тыдзень з 15 па 21 чэрвеня вытворчасць бензіну ў Расіі знізілася на 25% у параўнанні з сярэднясутачным паказчыкам чэрвеня 2025 года. Аб праблемах з бензінам заявілі ў вялікай колькасці рэгіёнаў РФ. Гэтая праблема абмяркоўвалася 28 чэрвеня на нарадзе ў Пуціна.