Рэжысёрка Мара Тамковіч здымае фільм пра беларускую эмігрантку

Рэжысёрка Мара Тамковіч працуе над псіхалагічнай драмай "Паўночнае ззянне" (Northern Lights) пра беларускую эмігрантку.

Праект увайшоў у склад міжнароднай праграмы MIDPOINT Feature Launch 2026, якая пройдзе 1-8 ліпеня ў межах індустрыяльнай праграмы кінафестывалю ў Карлавых Варах, заўважыў канал "Свяшчэнны Белавуд".

Паводле сюжэту, галоўная гераіня Леся набывае вядомасць дзякуючы сваім радыкальным палітычным перформансам падчас антыўрадавых пратэстаў у Беларусі. Пасля нападу сілавікоў на яе выступ і арышту блізкага сябра дзяўчына ўцякае ў Хельсінкі, дзе сутыкаецца з новай рэальнасцю: прызнанне ў еўрапейскай арт-супольнасці ператварае яе найперш у "палітычную мастачку ў выгнанні".

Спроба выйсці за межы гэтага вобраза прымушае Лесю зрабіць няпросты выбар паміж творчай свабодай і кар'ерным поспехам. Страціўшы ўсё, яна апынаецца ў Лапландыі, дзе фізічная праца і жыццё ўдалечыні ад публічнай увагі прымушаюць яе адказаць на галоўнае пытанне: хто яна, калі на яе ніхто не глядзіць?

Фільм ствараецца ў каапрадукцыі Фінляндыі, Польшчы і Харватыі. Акрамя Тамковіч у праекце працуюць прадзюсарка Мер'я Рытола (Merja Ritola) і беларуская сцэнарыстка Юлія Паграбняк.

Бюджэт фільма цэньваецца прыкладна ў 3 млн еўра.