Літоўца з дзецьмі не прапусцілі ў Беларусь у выніку санкцый ЕС

Санкцыі перашкодзілі літоўскаму прадпрымальніку прыехаць у Беларусь на сваім аўтамабілі.

Пра гэтае здарэнне Гіціс Валкавічус расказаў у сваім акаўнце ў Інстаграме, заўважыў партал Delfi. Мужчына разам з дзецьмі рэгулярна ездзіць у Беларусь, але гэтым разам паездка не атрымалася.

"У Беларусь мы ездзілі мільён разоў, для нас гэта звычайная паездка. Ля мяжы мы сталі ў чаргу для еўрапейскіх машын. Падышла работніца мытні, папрасіла пашпарт і дакументы на машыну. Я ўсё даў. Вярнулася праз нейкі час і спытала, куды мы едзем. Я кажу: з дзецьмі, хочам пацешыцца Беларусі. Яна кажа: добра, пачакайце крыху. Пайшла, вярнулася праз пяць хвілін. Кажа: на жаль, павінна вас засмуціць, сёння ў вас забавак у Беларусі не будзе", — падзяліўся сваёй крыўдай літовец.

Яму патлумачылі, што забарона на выезд у Беларусь звязаная з аб'ёмам рухавіка аўтамабіля — ён занадта магутны.

"Кажа, рухавік чатырохлітровы. Ну так, кажу, я з дзецьмі — не паедзеш з імі на невялікай машыне. Адказвае: дзейнічаюць санкцыі, у Беларусь можна ехаць толькі на машыне з 2,5-літровым рухавіком. Я кажу: як мне з такой колькасцю дзяцей у маленькай машыне ехаць?" — абураецца Валкавічус.

Прадпрымальнік раскрытыкаваў санкцыі і заявіў, што яны дзейнічаюць не супраць Беларусі, а супраць яго як грамадзяніна Літвы.

Абмежаванні на вываз аўтамабіляў у Беларусь літва ўвяла ўвесну 2024 года ў рамках санкцый ЕС. Цяпер праз літоўскую мяжу забаронены вываз легкавых аўтамабіляў з рухавіком унутранага згарання аб'ёмам больш за 1,9 літра, гібрыдных аўтамабіляў з рухавіком звыш 1,9 літра, а таксама электрамабіляў коштам больш за 50 тысяч еўра. Пад санкцыі трапілі як новыя, так і карыстаныя аўтамабілі.