У Казахстане абнулілі тэрмін прэзідэнцтва Такаева

Вышэйшыя службовыя асобы Казахстана (у тым ліку прэзідэнт Касым-Жамарт Такаеў) могуць зноў заняць свае крэслы, і гэта будзе лічыцца іх першым тэрмінам на пасадзе пры новай Канстытуцыі краіны. Такое рашэнне прыняў Канстытуцыйны суд Казахстана, піша выданне vlast.kz.

Суд у сваё пастанове адзначыў, што Канстытуцыя, якая дзейнічае з 1 ліпеня, замацоўвае аднаразовы тэрмін паўнамоцтваў адной і той жа асобы на адпаведнай пасадзе. Напрыклад, толькі адзін раз могуць быць абраныя прэзідэнт Казахстана, старшыня ці суддзя Канстытуцыйнага суда, старшыня Вярхоўнага суда, генеральны пракурор. Але асобы, якія займалі гэтыя пасады ў адпаведнасці з Канстытуцыяй 1995 года, могуць быць абраныя ці прызначаныя на адпаведныя пасады пасля таго, як набудзе моц новая Канстытуцыя.

Такаеў стаў прэзідэнтам Казахстана ў чэрвені 2019 года. У 2022 годзе, пасля прыняцця паправак у Канстытуцыю, яго паўнамоцтвы былі абнуленыя, пасля чаго ён зноў балатаваўся і быў абраны на прэзідэнцкую пасаду ў лістападзе таго ж года. Прэзідэнцкія паўнамоцтвы Такаева павінны скончыцца ў 2029 годзе. І ён сам, і яго асяроддзе неаднаразова падкрэслівалі, што Такаеў не плануе ісці на наступныя выбары.