Калі пройдуць свабодныя і справядлівыя выбары, я не буду ў іх удзельнічаць — Ціханоўская

Святлана Ціханоўская не плануе ўдзельнічаць у выбарах у Беларусі. Пра гэта лідарка беларускіх дэмакратычных сілаў заявіла ў інтэрв'ю літоўскаму выданню LRT.

Палітык адзначыла, што ідэя пра заканчэнне яе мандата ідзе ад прапагандыстаў КДБ: "Яны спрабуюць перавесці размову з нелегітымнага статусу Лукашэнкі пасля 2020 года на імя Ціханоўскай. Гэта вельмі выразны сігнал таго, што яны разумеюць, што беларускае грамадства больш не бачыць у Лукашэнку лідара, што людзі не здаюцца і працягваюць змагацца".

Ціханоўская заявіла, што цяпер у Беларусі намагчыма правесці свабодныя і справядлівыя выбары, але яна штодня адчувае, што беларусы падтрымліваюць ідэю свабоднай і незалежнай еўрапейскай краіны. "Магу выразна сказаць: калі адбудуцца свабодныя і справядлівыя выбары, я не буду ў іх удзельнічаць. Такім чынам, не будзе неабходнасці канкураваць, месца пад сонцам хопіць усім палітыкам, кожны зможа набіраць палітычныя ачкі", — сказала яна. Сёння ж, на яе думку, варта захоўваць адзінства для перамогі над дыктатарам, пасля якой з'явіцца шанец на палітычную канкурэнцыю.

У атачэнні Лукашэнкі, кажа Ціханоўская, многія таксама стаміліся ад яго: "Таму мы прапануем тым, хто належыць да сістэмы, дыскусіі, перамовы, сумесную працу па захаванні суверэнітэту Беларусі. Лукашэнка ўжо бітая карта. Яму пляваць на Беларусь, яму пляваць на нацыю, нацыянальную ідэнтычнасць — ён проста хоча палітычна выжыць".

Выжыванне ж рэжыму Лукашэнкі цяпер залежыць ад Расіі. "Але праз новую дынаміку вайны паміж Украінай і Расіяй, праз палітыку Украіны ў дачыненні да Беларусі ён апынуўся ў пастцы. Мы павінны працягваць ціск", — падкрэслівае лідарка дэмсілаў.

Таму яна лічыць неабходным, каб Еўрасаюз працягваў палітыку санкцый супраць рэжыму Лукашэнкі. Гэта, на яе думку, добра спалучаецца з амерыканскай гуманітарнай місіяй па вызваленні палітвязняў: "Вызваленне палітычных зняволеных — гэта сумесны вынік амерыканскай дыпламатыі і моцнай, цвёрдай, прынцыповай пазіцыі Еўрапейскага Саюза. Без гэтай шасцігадовай моцнай пазіцыі ў Лукашэнкі не было б матывацыі вызваляць палітвязняў. Пакуль амерыканцы прыкладаюць намаганні для вызвалення людзей, мы просім Еўропу захоўваць цвёрдую, прынцыповую пазіцыю і не пачынаць размоваў пра адмену санкцый. Зараз для гэтага не час".

Паводле яе, нават пасля вызвалення палітвязняў пагрозы з тэрыторыі Беларусі не знікнуць, пакуль кіруе Лукашэнка: "У Літву будуць ляцець паветраныя шары, на межах будуць збірацца мігранты, а з тэрыторыі Беларусі будзе пагражаць ядзерная зброя ці "Іскандэры".

Ціханоўская падкрэсліла, што ў інтарэсах Еўропы мець побач з сабой свабодную і дэмакратычную Беларусь: "Наша мэта павінна быць не ў тым, каб дапамагчы Лукашэнку ў яго цяжкі перыяд, не ў тым, каб выратаваць яго ад Пуціна. Мэта павінна быць у тым, каб выратаваць Беларусь ад Лукашэнкі і Пуціна. Гэта павінны быць стратэгічныя пункты нашых саюзнікаў".