Беларусь нарошчвае чыгуначны вываз грузаў на акупаваныя тэрыторыі Украіны
Цягнік, ілюстрацыйнае фота / pskovrail.ru
За чатыры месяцы 2026 года пастаўкі з Беларусі на акупаваныя тэрыторыі Украіны былі большыя, чым за ўвесь 2025 год. Гэта заўважыла Супольнасць чыгуначнікаў Беларусі.
Як адзначаюць чыгуначнікі, у 2024-м пастаўкі ішлі пераважна з акупаваных раёнаў Украіны ў Беларусь.
Летась рух стаў двухбаковым. Па выніках 2025 года ў Беларусь з акупаваных тэрыторый Украіны было ўвезена 911 вагонаў з грузамі агульнай масай 57 319 тон. У зваротным кірунку было адпраўлена 470 вагонаў агульнай масай 26 392 тоны.
За першыя чатыры месяцы 2026 года (студзень-красавік) у Беларусь даставілі толькі 67 вагонаў з грузамі агульнай масай 3 808 тон. А вось з нашай краіны на акупаваныя ўкраінскія тэрыторыі было вывезена 573 вагоны агульнай масай 31 519 тон. Такім чынам, сёлета за чатыры месяцы пастаўкі грузаў з Беларусі заўважна выраслі.
Аснову беларускага экспарту склалі нафтапрадукты, цэмент, жалезабетонныя вырабы, будаўнічыя матэрыялы ды іншыя грузы. Чыгуначнікі таксама адзначаюць, што выраслі аб'ёмы паставак бензіну, дызельнага паліва і звадкаваных вуглевадародных газаў.
