Журналісту Кірылу Пазняку і яго дачцэ Яніне прысудзілі пазбаўленне волі

26 чэрвеня ў Мінскім гарадскім судзе былі абвешчаныя прысуды журналісту Кірылу Пазняку і ягонай дачцэ Яніне, паведамляе тэлеканал "Белсат".

Кірылу Пазняку прысудзілі тры з паловай гады пазбаўлення волі. Таксама ён павінен заплаціць штраф 550 базавых велічыняў (24 750 рублёў).

Дакладны прысуд, вынесены ягонай дачцэ, невядомы. Абвінавачанне прасіла пакараць бацьку і дачку пазбаўленнем волі на тры з паловай і тры гады адпаведна.

Бацьку і дачку абвінавацілі паводле двух артыкулаў Крымінальнага кодэкса — у стварэнні экстрэмісцкага фармавання і дыскрэдытацыі Беларусі. Затрымалі іх 3 верасня 2025 года. У той жа дзень КДБ прызнаў "экстрэмісцкім фармаваннем" YouTube-канал "Платформа 375", які стварыў Кірыл Пазняк. Уся віна Яніны была ў тым, што яна зарэгістравала канал у TikTok.

Кірыл Пазняк спрабаваў на сваім канале дыстанцыявацца і ад уладаў, і ад апазіцыі. У 2021-м і ў 2022-м ён быў мадэратарам анлайн-дэбатаў паміж праўладнымі прапагандыстамі і іх апанентамі, якія вымушаныя былі пакінуць краіну праз пагрозу рэпрэсій.

За кратамі журналіст перанёс COVID-19 і цяжкую пнеўманію. Некалькі дзён ён правёў на апараце штучнага дыхання.