Каля мяжы з Беларуссю будуюцца аб’екты ваеннага прызначэння — выведка Украіны

Уздоўж украінска-беларускай мяжы завяршаецца будаўніцтва дарожнай інфраструктуры, складоў боепрыпасаў і паліва, якія не маюць іншага прызначэння, акрамя ваеннага. Пра гэта паведаміў начальнік Службы знешняй разведкі Украіны Алег Лугаўскі на сустрэчы з прэзідэнтам Украіны Уладзімірам Зяленскім.

Паводле дадзеных разведкі, будаўніцтва вядзецца на пяці памежных напрамках: Кобрын — Ковель, Іванава — Маневічы, Лунінец — Сарны, Рэчыца — Карастэнь і Гомель — Чарнігаў.

У расійскіх дакументах гэтая дзейнасць апісваецца ў кантэксце задач так званай "СВА", адзначыў Лугаўскі. Паводле яго ацэнкі, работы вядуцца пад відавочным расійскім уплывам і накіраваныя на падрыхтоўку да патэнцыйнага пашырэння агрэсіі супраць Украіны.

Украіна накіравала Беларусі адпаведныя сігналы — як наконт будаўніцтва інфраструктуры, так і іншых формаў супрацоўніцтва Мінска з Масквой. Паводле слоў Лугаўскога, беларускаму боку вядома, якія крокі неабходныя для дээскалацыі.

Нагадаем, раней Уладзімір Зяленскі запатрабаваў адключыць рэтранслятары, якія наводзяць расійскія дроны. Беларускі бок выканаў гэты ўльтыматум.

Таксама Зяленскі заявіў, што Украіна ведае пра пастаўкі беларускага паліва з Мазырскага НПЗ расійскай арміі.