Дырэктар "Славянскага базару" расказаў пра "чорныя спісы" артыстаў

Некаторых артыстаў не запрашаюць на фестываль "Славянскі базар у Віцебску" з палітычных прычынаў.

Пра наяўнасць "чорных спісаў" у дырэктара фэсту Глеба Лапіцкага спытаўся блогер Ягор Ермакоў. Лапіцкі не даў канкрэтнага адказу, але заявіў, што некаторых артыстаў арганізатары запрасіць не могуць:

"Ёсць артысты, якіх мы не запросім на "Славянскі базар". Мы не хаваем: вы ведаеце, 2020-2021-ы год паказаў вельмі многіх артыстаў, якія былі сябрамі, якія былі не сябрамі".

Таксама ён заявіў, што арганізатары арыентуюцца на "вялікі крытэрый этычнасці, эстэтычнасці артыста", таму не запросяць выступоўцаў са скандальнай рэпутацыяй. "Бо кожны наш нейкі маленькі пралік — гэта асацыяцыя пра краіну", — сказаў Лапіцкі. Паводле яго, лепей хай гледачы запомняць цэлафанавы намёт, чым скандальнага артыста.

"Чорныя спісы" артыстаў у Беларусі існуюць ужо трэцяе дзесяцігоддзе. Яны перыядычна абнаўляюцца. Не так даўно ў СМІ трапляў чарговы спіс гуртоў і выканаўцаў, песні якіх нельга выконваць у караоке або запрашаць на афіцыйныя мерапрыемствы.