Гурт "Беларускія песняры" цяпер называецца "Беларускія легенды"
"Беларускія легенды" / transportfest.ru
Гурт "Беларускія песняры" цяпер выступае пад назвай "Беларускія легенды".
У калектыў увайшла вялікая колькасць музыкаў, якія гралі ў славутым складзе "Песняроў" разам з Уладзімірам Мулявіным — Валерый Дайнека, Ігар Пеня ды іншыя.
"Беларускія Песняры" былі адным з двух калектываў, якія прэтэндавалі на спадчыну мулявінскага гурта. Другім стаў Беларускі дзяржаўны ансамбль "Песняры", якім апякуецца Мінкульт Беларусі.
Паміж калектывамі цягнуліся доўгія спрэчкі за права на брэнд, але ўрэшце ў 2010-2011 гадах усе прэтэнзіі былі знятыя: калектыў змог выступаць пад назвай "Беларускія Песняры".
А ў красавіку 2024 года стала вядома, што Мінкульт Беларусі забараніў музыкам выступаць пад гэтым брэндам. Ведамства скарысталася тым, што прававая ахова брэнда была спыненая ў 2020 годзе у сувязі з ліквідацыяй ТАА, якое мела на яго правы. Пасля гэтага калектыў змяніў назву на "Беларускія легенды".
