Некаторыя беларусы змогуць запрасіць сваякоў у Польшчу праз натарыяльнае запрашэнне

Беларусы, якія знаходзяцца ў Польшчы на гуманітарных падставах, могуць запрашаць сваякоў праз консула на падставе натарыяльнага запрашэння. Пра гэта паведамляецца ў тэлеграм-канале Аб'яднанага пераходнага кабінета.

«Калі казаць пра сітуацыю грамадзян Беларусі, якія знаходзяцца на тэрыторыі Рэспублікі Польшча на падставе гуманітарных віз, дазволаў на часовы побыт, атрыманых па гуманітарных прычынах, або дадатковай абароны, варта выразна падкрэсліць, што бліжэйшыя члены сем’яў гэтых асоб (бацькі, дзеці, дзядулі, бабулі, унукі) маюць магчымасць звяртацца па візы на падставе натарыяльна завераных запрашэнняў".

Такі адказ Міністэрства замежных спраў Польшчы дало на адпаведны зварот намесніка кіраўніцы АПК, дэлегата Каардынацыйнай рады Паўла Латушкі.

Паведамляецца, што раней да Латушкі звярнуліся беларусы, якія жывуць у Польшчы на падставе дазволу на побыт па гуманітарных прычынах. Яны папрасілі дапамагчы вырашыць праблему з запрашэннем сваякоў у Польшчу.

Раней консульства Польшчы ў Мінску казала, што людзі, якія маюць часовы дазвол на жыхарства, могуць запрасіць сваіх бацькоў у Польшчу праз запрашэнне, аформленае ў ваяводскім упраўленні. А ў ваяводскім упраўленні адказалі, што аформіць запрашэнне можа замежнік, які легальна і бесперапынна пражываў на тэрыторыі Польшчы не менш за пяць гадоў, ці мае дазвол на пастаяннае пражыванне, ці мае дазвол на побыт доўгатэрміновага рэзідэнта ЕС.

У адказе МЗС Польшчы гаворыцца, што ў перапісцы з консулам для прызначэння даты падачы візавай заявы неабходна падаваць "поўную інфармацыю пра падставу атрымання права на жыхарства ў Польшчы. Консул, атрымаўшы толькі скан карты побыту з адзнакай "доступ да рынку працы", не можа вызначыць, ці была карта атрыманая на падставе дазволу на часовы побыт і працу, ці па гуманітарных прычынах, якія таксама даюць права на працаўладкаванне, хоць сама падстава для падачы заявы на права на жыхарства зусім іншая". Каб прыняць правільнае рашэнне, консул павінен мець поўную інфармацыю пра таго, хто запрашае.