Латушка звярнуўся да ўладаў Польшчы наконт умоваў працы беларускіх таксоўцаў

Намеснік кіраўніцы Аб'яднанага пераходнага кабінета Павел Латушка звярнуўся да ўладаў Польшчы. Ён просіць пры падрыхтоўцы новых правілаў для кіроўцаў таксовак улічыць сітуацыю беларусаў пад міжнароднай абаронай, паведамляе прэс-служба АПК.

Згодна з новымі нормамі таксоўцы будуць абавязаныя для працы падаваць даведку аб несудзімасці з краіны паходжання. Для беларусаў са статусам міжнароднай абароны гэта можа быць немагчыма і небяспечна: кантакты з уладамі РБ могуць паставіць пад пагрозу іх статус і бяспеку. Латушка прапануе, каб беларусам у такіх выпадках дазволілі выкарыстоўваць польскую даведку аб несудзімасці замест беларускай.

Таксама намеснік кіраўніцы АПК звяртае ўвагу на праблему з перарэгістрацыяй аўтамабіляў з беларускімі нумарамі. Многія беларусы не могуць прадаць свой аўтамабіль ці зняць яго з уліку ў Беларусі, бо гэтаму перашкаджаюць абмежаванні, уведзеныя рэжымам Лукашэнкі.

Латушка прапануе, каб для беларусаў пад міжнароднай абаронай дзейнічаў ільготны механізм перарэгістрацыі такіх аўтамабіляў у Польшчы.