За "Фондам Першага" выявілі членаў сям’і і атачэнне Ірыны Абельскай

Да лукашэнкаўскага "Фонду Першага" прамое дачыненне маюць людзі з атачэння Ірыны Абельскай — галоўнага лекара Рэспубліканскай бальніцы Кіраўніцтва справамі Лукашэнкі і маці Мікалая Лукашэнкі. Гэта высветлілі журналісты-расследвальнікі "Бюро".

Фонд быў заснаваны ў кастрычніку 2022-га. У кастрычніку 2023-га Лукашэнка заявіў, што фонд павінен "акумуляваць грошы тых, хто неабыякавы", і дапамагаць тым, хто мае патрэбу. Афіцыйнай прычынай з’яўлення фонду называлася зачыстка папярэдняга сектара НКА і НДА пасля пратэстаў 2020 года.

Фонд зарэгістраваны па адрасе: Мінск, вуліца Чырвонаармейская, 15. Гэта новая рэзідэнцыя Лукашэнкі ў цэнтры сталіцы — са спа-цэнтрам, басейнам, канферэнц-залай, працоўным кабінетам і спальняй. Фонд не публікуе фінансавыя паказчыкі, яго штогадовыя справаздачы не з’яўляюцца на сайце Міністэрства юстыцыі, а ў даступных дакументах не пазначаны нават дырэктар.

Сярод супрацоўнікаў фонду расследвальнікі знайшлі Дзіну Фейсал эль-Дзіэфі. Яна ж працуе і ў Рэспубліканскай бальніцы Кіраўніцтва справамі Лукашэнкі, якую ўзначальвае Абельская. Дзіна эль-Дзіэфі неаднаразова суправаджала сваю начальніцу на розных мерапрыемствах.

Таксама яна суправаджае Дзмітрыя Абельскага — старэйшага сына Ірыны Абельскай. У іх ёсць агульны сын. Хутчэй за ўсё, яны жанатыя, бо ў Дзмітрыя заўважылі масіўны шлюбны пярсцёнак на безыменным пальцы левай рукі.

Яшчэ адна супрацоўніца фонду — Наталля Іванова (у дзявоцтве Дударава). Яе імя фігуруе таксама сярод супрацоўнікаў прыватнай Мінскай міжнароднай гімназіі і кіроўнай кампаніі "Гарызонты ведаў". Заснавальніцай гімназіі была Ірына Абельская, а пазней школа перайшла ў кіраванне кампаніі «Гарызонты ведаў».

Таксама Іванова была сузаснавальніцай кампаніі "Маркетвіжн", якая пэўны час узначальвала кампанію "Гарызонты ведаў". Цяпер звесткі пра ўладальнікаў Мінскай міжнароднай гімназіі і "Гарызонтаў ведаў" засакрэчаныя.