Жлобінцам не рэкамендуюць пакуль піць ваду з-пад крана

Хаця падачу вады ў Жлобіне пасля аварыі аднавілі, але піць яе з-пад крана не рэкамендуюць. У Жлобінскім райвыканкаме папярэдзілі, што да 12:00 10 ліпеня ў сістэме будзе праводзіцца дэзінфекцыя.

"У сувязі з гэтым просім вас часова ўстрымацца ад піцця сырой вады з-пад крана і выкарыстання яе для гатавання ежы без папярэдняга кіпячэння", — гаворыцца ў паведамленні.

Аварыя на водазаборы ў Жлобіне адбылася 9 ліпеня каля 4-й гадзіны раніцы. Без вады застаўся 75-тысячны райцэнтр і некалькі вёсак каля яго. У горадзе быў арганізаваны падвоз вады да некалькіх пунктаў. Прыкладна апоўдні камунальнікі здолелі ўзнавіць падачу вады, але папярэдзілі, што яна будзе мець слабы напор і кепскую якасць.