Экс-палітвязню Ігару Карнею анулявалі беларускі пашпарт

Былы палітвязень-журналіст Ігар Карней, вызвалены паводле дамоўленасцяў з ЗША 21 чэрвеня 2025 года, застаўся ў Партугаліі без адзінага легальнага дакумента. Пра гэта ён напісаў у сваім акаўнце ў Фэйсбуку.

"Посткаланіяльны бомж: мінус — віза і пашпарт, плюс — замарожаны працэс “абароны”. Урэшце скончылася і апошняя паперка, якая надавала хоць нейкай  легітымнасці на гэтым свеце. Гэта я пра нацыянальную літоўскую візу, якую атрымаў неўзабаве пасля чэрвеньскага выдварэньня-2025 — першай з больш-менш масавых здзелак у гандлі палітзэкамі", — напісаў Ігар Карней.

Экс-палітвязень кажа, што спачатку не мог легалізавацца на падставе ўз'яднання сям’і, бо ў яго патрабавалі даведку аб несудзімасці. Потым ён быў вымушаны быў падацца на атрыманне міжнароднай абароны. За гэты час стала вядома, што ў Беларусі анулявалі ягоны пашпарт.

"Ну і кантрольны стрэл — ужо з "хрустальнага сасуда". Цяжка сказаць, калі тое здарылася, але даведаўся, як пайшлі першыя сігналы ад выдвараных калег: крывавы рэжым у бонусным фармаце дробнай пакасці абнуліў пашпарт, нягледзячы на прапісаную ягоную прыдатнасць да 2030 года".

Раней журналіст расказаў, што атрымаў ад Следчага камітэта запрашэнне з'явіцца ў Мінск, каб атрымаць 1 рубель. А сёлета ў сакавіку яго выклікаў аддзел прымусовага пакарання Фрунзенскага раёна сталіцы, бо Карнею налічылі запазычанасць у 258,5 рубля.