Лукашэнка сказаў, што нядаўна сустракаўся з прадстаўнікамі Зяленскага

Аляксандр Лукашэнка заявіў пра нядаўнюю сустрэчу з прадстаўнікамі Зяленскага. Гэта прагучала падчас яго размовы з губернатарам Падмаскоўя, які прыехаў у Мінск.

"Вось на гэтым месцы нядаўна былі прадстаўнікі Зяленскага. Я ім прама сказаў: "Хлопцы, вы перадайце свайму прэзідэнту: калі ён думае, што можна так вось з намі размаўляць і яшчэ ўцягнуць нас у вайну, то ён павінен разумець, што якасць вайны імгненна зменіцца. Гэта вайна будзе зусім іншая", — нібыта заявіў Лукашэнка ўкраінцам.

У адказ яму нібыта сказалі, што ўкраінцы гэта разумеюць. Таксама Лукашэнка дадаў, што трэба будзе "істотна дамаўляцца".

Адметна, што сказаў гэта Лукашэнка менавіта гасцям з Расіі — то бок найперш для расійскай аўдыторыі і кіраўніцтва.

19 чэрвеня прэзідэнт Украіны Уладзімір Зяленскі публічна агучыў ультыматум Лукашэнку — запатрабаваў цягам тыдня адключыць на тэрыторыі Беларусі рэтранслятары, якія дапамагалі расійскім ударным дронам атакаваць Украіну. СМІ заўважылі, што з 21 чэрвеня палёты расійскіх дронаў уздоўж беларуска-ўкраінскай мяжы спыніліся. А 24 чэрвеня Зяленскі пацвердзіў адключэнне рэтранслятараў на тэрыторыі Беларусі.