Два мінчукі арганізавалі фіктыўную адпрацоўку па размеркаванні 200 выпускнікам ВНУ
Студэнцкая аўдыторыя, ілюстрацыйнае фота
Пракуратура Мінска завяршыла расследаванне справы двух мінчукоў, якія арганізавалі фіктыўныя адпрацоўкі выпускнікам ВНУ.
Згодна з матэрыяламі справы, ад снежня 2018-га па ліпень 2024 года яны дапамаглі 211 выпускнікам фіктыўна ўладкавацца на працу па размеркаванні. Арганізатары рыхтавалі неабходныя дакументы для камісій па размеркаванні, а выпускнікі працавалі ў кампаніях, створаных фігурантамі справы.
Паведамляецца, што "абвінавачаныя размяшчалі аб'явы рэкламнага характару ў сетцы інтэрнэт для пошуку зацікаўленых у афармленні фіктыўнага працаўладкавання, кансультавалі іх, выступаючы пры гэтым кіраўнікамі афіляваных юрыдычных асоб, асабіста вызначалі памеры свайго матэрыяльнага ўзнагароджання і спосабы яго пералічэння".
Адзін затрыманы знаходзіцца пад вартай, другі — на волі пад паручальніцтвам. Ім інкрымінуюць дапамаганне ў прычыненні маёмаснай шкоды шляхам падману або злоўжывання даверам без прыкмет крадзяжу.
