Магчыма, цяпер самы небяспечны час для Беларусі — Фрыдман

Гісторык і палітычны аглядальнік Аляксандр Фрыдман заявіў у сваім падкасце, што цяперашні момант можа быць самым небяспечным для Беларусі з лютага-сакавіка 2022 года з-за рызыкі ўцягвання краіны ў вайну. Так ён пракаментаваў ультыматум прэзідэнта Украіны Уладзіміра Зяленскага на адрас Аляксандра Лукашэнкі.

На думку Фрыдмана, у Кіеве склалася ўяўленне пра слабасць і няўпэўненасць Лукашэнкі, а таксама пра яго страх перад Украінай, што і стала падставай для ціску і ультыматуму.

Гісторык адзначыў, што Украіна цяпер дэманструе новую самасвядомасць: украінская армія наносіць удары па расійскай тэрыторыі, а ініцыятыва на фронце паступова пераходзіць на бок Кіева.

"Не паспрабаваць аказаць ціск на Лукашэнку, які, на думку ўкраінцаў, і так баіцца і больш за ўсё баіцца менавіта Украіны, было б дзіўна", — сказаў Фрыдман.

Паводле яго слоў, у Беларусі варта чакаць прапагандысцкай кампаніі супраць Зяленскага, тады як афіцыйныя асобы, у тым ліку сам Лукашэнка, хутчэй за ўсё, будуць рэагаваць стрымана або ўвогуле ўстрымаюцца ад публічных заяваў, каб не паддавацца на правакацыю.

Разам з тым, адзначыў эксперт, Мінск можа распачаць пэўныя крокі, паколькі Лукашэнка ўжо паказаў, што асцерагаецца дзеянняў з боку Украіны. У прыватнасці, паводле слоў Фрыдмана, не выключана скарачэнне паставак прадукцыі беларускіх нафтаперапрацоўчых заводаў.

Удары па гэтых аб’ектах, дадаў ён, нанеслі б сур’ёзную шкоду эканоміцы Беларусі і фактычна азначалі б перанос баявых дзеянняў на яе тэрыторыю.