Пракуратура змусіла прадпрымальніка вярнуць у РБ дывідэнды, выплачаныя замежнаму ўласніку
Грошы, ілюстрацыйнае фота / LookByMedia
Сталічнае прадпрыемства абвязалі вярнуць у Беларусь 21 тысячу рублёў — гэтыя грошы былі выплачаныя як дывідэнды заснавальніку з "недружалюбнай дзяржавы".
Адпаведнае рашэнне прыняла пракуратура Мінска. У ведамстве спаслаліся на тое, што дывідэнды былі пералічаныя без дазволу Мінгарвыканкама.
"Акт нагляду выкананы ў поўным аб'ёме", — адрапартавалі ў пракуратуры.
Раней урад прыняў пастанову, згодна з якой уласнікі прадпрыемстваў з краін, уключаных у спіс "недружалюбных", могуць атрымліваць дывідэнды ад беларускіх актываў толькі з дазволу мясцовых уладаў.
