У "гаманца Лукашэнкі" знайшлі новы бізнес з мільярднай выручкай

На беларускім рынку гандлю нафтапрадуктамі з’явілася новая фірма — "Мінерал Гудс Трэйд". Кампанія працуе толькі два гады, а яе выручка перавысіла ўжо мільярд долараў. Як высветлілі расследвальнікі "Бюро", гэтая кампанія звязаная з уплывовым бізнесоўцам Мікалаем Вараб’ём, якога называюць "гаманцом Лукашэнкі".

61-гадовы Варабей уваходзіць у топ-3 паспяховых бізнесоўцаў Беларусі з актывамі ў паліўнай і лагістычнай галінах. Ён знаходзіцца пад санкцыямі ЕС са снежня 2020 года і пад санкцыямі ЗША — са жніўня 2021-га. У амерыканскі "чорны спіс" трапіла таксама частка яго актываў: "Інтэрсэрвіс", "БелКазТранс", "Новая нафтавая кампанія" ды іншыя.

Пасля ўвядзення санкцый Варабей пачаў адкрываць новыя фірмы, якія рэгіструе на давераных асоб. Адной з такіх кампаній стала "Мінерал Гудс Трэйд" (МГТ), зарэгістраваная ў снежні 2022 года ў Наваполацку. У гэтым горадзе бізнесовец пачынаў сваю кар’еру.

Кіраўнік МГТ Андрэй Шышко мае досвед працы ў нафтагандлі і лагістыцы. Дзякуючы "Кіберпартызанам" журналісты даведаліся, што да Вараб'я ён уладкаваўся ў 2021 годзе. Спачатку Шышко працаваў у "Новай нафтавай кампаніі", потым — у кампаніі "Лэндрэсурс". З чэрвеня 2023 года ён узначальвае "Мінерал Гудс Трэйд".

А намінальным уладальнікам МГТ з’яўляецца Кірыл Бяляеў — ураджэнец Наваполацка, які ўсё жыццё адпрацаваў у "Віцебскэнерга".

Асноўным відам дзейнасці МГТ значыцца оптавы гандаль топачным мазутам. Па выніках 2024 года выручка кампаніі перавысіла 3,5 мільярда рублёў, а чысты прыбытак — 51 мільён рублёў. Такія паказчыкі ёсць мала ў якога беларускага прадпрыемства.

Летась выручка знізілася амаль на 80% — да 715 мільёнаў рублёў. Чысты прыбытак таксама паменшаў, але не так значна — на 2%, да 50 мільёнаў рублёў.

Пасля ўвядзення еўрапейскіх санкцый Беларусь страціла важныя каналы транспартавання нафтапрадуктаў праз краіны Балтыі. У выніку цяпер патокі пайшлі праз расійскія парты, адкуль беларускія нафтапрадукты накіроўваюцца ў іншыя краіны — напрыклад, у Індыю ці Кітай. Для абыходу санкцый нярэдка выкарыстоўваюць фірмы-пракладкі.