У Ратамцы расказалі, чаму высяляюць прыватных коней
РЦАП у Ратамцы высяляе амаль сотню прыватных коней / БЕЛТА
Кіраўніцтва Рэспубліканскага цэнтра алімпійскай падрыхтоўкі (РЦАП) па конным спорце і конегадоўлі пракаментавала высяленне прыватных коней.
Пра высяленне 90 коней, якіх трымалі ў РЦАП у Ратамцы на платнай аснове, стала вядома днямі. Навіна выклікала шырокі розгалас.
У каментары выданню "Прысталічча" намеснік гендырэктара РЦАП Уладзімір Краеўскі сказаў, што ва ўсім вінаватыя самі гаспадары коней. Дамовы на платнае ўтрыманне коней заключаюцца на год і заканчваюцца 1 ліпеня 2026-га. Для іх падаўжэння заказчык павінен падаць заяўку не пазней як за 14 дзён да заканчэння тэрміну дзеяння.
"Па стане на 25 чэрвеня ў цэнтр не паступіла ніводнай заяўкі, пададзенай ва ўстаноўленым парадку.
У сувязі з гэтым, а таксама па шматлікіх просьбах іншых уладальнікаў, якія жадаюць размясціць сваіх коней у цэнтры, аб празрыстым і справядлівым заключэнні дамоў на іх утрыманне, кіраўніцтва цэнтра разглядае магчымасць заключаць такія дамовы на конкурснай аснове", — заявіў Краеўскі.
