У РФ назвалі сваю версію тых, хто атакаваў аўтобус з беларускімі дзецьмі пад Бранскам
Аўтобус, пашкоджаны падчас атакі ў Бранскай вобласці / Ягор Кавальчук
Следчы камітэт РФ назваў сваю версію людзей, датычных да атакі на пасажырскі аўтобус з дзецьмі з Беларусі ў Бранскай вобласці.
Паводле расійскай версіі, загад атакаваць грамадзянскі транспарт на тэрыторыі РФ аддалі камандуючы Сіламі беспілотных сістэм УСУ Роберт Броўдзі і начальнік Галоўнага ўпраўлення разведкі Мінабароны Украіны Алег Івашчанка.
Таксама ў расійскім СК кажуць, што выявілі непасрэдных выканаўцаў тэракту. Гэта нібыта вайсковец падраздзялення беспілотных сістэм "Хімера" 105‑га памежнага атрада Дзяржаўнай памежнай службы Украіны (ДПСУ) Дзмітрый Ткачэнка, вайсковец памежнай камендатуры хуткага рэагавання "Шквал" 7‑га памежнага атрада ДПСУ Ігар Жукаў і вайсковец 73‑га марскога цэнтра спецыяльных аперацый УСУ Уладзіслаў Навум. У СК РФ кажуць, што высвятляюць іншых саўдзельнікаў злачынства.
Украінскі бок, як паведамлялася раней, адмовіў сваю датычнасць да атакі.
22 чэрвеня дзяржсакратар Савета бяспекі Беларусі Аляксандр Вальфовіч заявіў, што атаку на аўтобус з беларускімі дзецьмі арганізавалі для таго, каб сутыкнуць Беларусь з Украінай. Пры гэтым ён не сказаў, хто быў арганізатарам гэтага нападу.
