Ва Украіне завяршылі расследаванне па справе беларускі Іны Кардаш

Ва Украіне завяршылі расследаванне справы затрыманай беларускай журналісткі Іны Кардаш. Неўзабаве суд павінен пачаць папярэдні разгляд, паведамляе Радыё Свабода.

Згодна з украінскім заканадаўствам, пры наяўнасці падставаў суд можа закрыць справу нават па выніках разгляду абвінаваўчага акту. Калі абвінавачанне будзе адпавядаць законным патрабаванням, суд павінен прызначыць дату пачатку разгляду.

Іну Кардаш па-ранейшаму вінавацяць у шпіянажы. Ёй пагражае ад 10 да 15 гадоў пазбаўлення волі.

Таксама муж Іны Кардаш (добраахвотнік, які служыць у штурмавым падраздзяленні) праз суд дамогся вяртання грошай, арыштаваных падчас затрымання беларускі. У Кардаш пры сабе было 2150 долараў. Муж прынёс квітанцыі па выдачы ў банкамаце гэтых грошай з яго банкаўскай карткі.

Таксама вядома, што на пачатку чэрвеня муж паскардзіўся ў суд, што следчы не дазваляе яму спатканні з Кардаш. Суддзя не стаў пачынаць справу аб бяздзейнасці следчага, але абавязаў яго "забяспечыць выкананне правоў на сямейнае жыццё".

Іну Кардаш затрымалі ў Кіеве сёлета 21 студзеня. Яе вінавацяць у шпіянажы на карысць Камітэта дзяржаўнай бяспекі Беларусі. На момант затрымання беларуска працавала ў Каардынацыйным штабе па пытаннях абыходжання з ваеннапалоннымі Галоўнага ўпраўлення разведкі Мінабароны Украіны. Пазней украінскі бок заявіў, быццам гэта была фэйкавая пасада, створаная ў рамках выкрыцця шпіёнскай дзейнасці Кардаш.