Украіна зможа адказаць "бруднай бомбай" на расійскі ядзерны ўдар — Статкевіч

Мікалай Статкевіч мяркуе, што Украіна мае чым адказаць на магчымы расійскі ядзерны ўдар. І ён асцерагаецца, што адной з цэляў можа стаць Мінск. Пра гэта палітык разважае ў сваім тг-канале.

Статкевіч звяртае ўвагу на небяспеку гонкі ўзбраенняў, якая разгортваецца паміж РФ і Украінай. На яго думку, у гонцы дронаў перавагу маюць украінцы. А ў выкарыстанні балістычных ракет перавага застаецца за Расіяй "дзякуючы назапашанаму савецкаму досведу і захаванай вытворчай базе".

"Але Украіна ўжо пачала выпрабоўваць уласныя балістычныя ракеты. Улічваючы досвед і магчымасці ўкраінскай вайсковай прамысловасці, можна прагназаваць, што да канца года абмены ўдарамі балістычных ракет стануць блізкімі да парытэту", — мяркуе Статкевіч.

На яго думку, у выніку ўкраінскіх удараў у Расіі могуць пашырыцца патрабаванні нанесці ядзерны ўдар "ад людзей, якія не разумеюць рэальных наступстваў такога кроку". Статкевіч упэўнены, што Украіна нават без заходніх саюзнікаў здольная на ядзерны адказ — "брудную бомбу", калі над тэрыторыяй праціўніка з дапамогай звычайнага зарада, напрыклад, авіябомбаў ці ракет, распыляюцца радыеактыўныя рэчывы. Якіх ва Украіны, дзякуючы наяўнасці атамных электрастанцый, дастаткова".

Расійскі ядзерны ўдар па Кіеве, кажа палітык, можа выклікаць у адказ радыеактыўнае заражэнне Масквы ці Санкт-Пецярбурга. А калі расіяне нанясуць удар з тэрыторыі нашай краіны, тады Беларусь у адказ атрымае "яшчэ адзін радыяцыйны ўдар, толькі ўжо не па ўскраіне краіны, як у 1986 годзе, а, напрыклад, па нашай сталіцы. Лічу, што аднаго Чарнобыля нам і так хапіла", — рэзюмуе Статкевіч.