Аўтобус з дзіцячай футбольнай камандай з Беларусі трапіў пад абстрэл дронаў у Расіі
Аўтобус, які трапіў пад абстрэл / t.me/newsby_btrc
У Бранскай вобласці Расіі пад абстрэл дронаў трапіў аўтобус з дзіцячай футбольнай камандай з Беларусі. Пра гэта паведаміў часовы кіраўнік Бранскай вобласці Ягор Кавальчук.
Паводле яго, беспілотнік пацэліў у аўтобус з дзіцячай футбольнай камандай, якая ехала на адпачынак у Геленджык. Адказнасць за тое, што адбылося Кавальчук усклаў на ВСУ. У СМІ ўдакладняюць, што ў аўтобусе ехалі выхаванцы дзіцяча-юнацкай спартовай школы №2 з Рэчыцы.
У Расіі заяўляюць, што дроны былі ўкраінскімі.
У выніку атакі загінула жанчына, якая суправаджала каманду. Раненні атрымалі сямёра чалавек, у тым ліку чацвёра дзяцей. Адно дзіця знаходзіцца ў цяжкім стане, яшчэ шасцёра — у стане сярэдняй цяжкасці.
Еўрарадыё затэлефанавала ў рэчыцкую дзіцяча-спартовую школу. "Мы ведаем, што нешта здарылася, але не больш за тое. Чакайце інфармацыю ад афіцыйных органаў", — у дзіцяча-юнацкай спартовай школе №2 з Рэчыцы пакуль няма дакладнай інфармацыі пра тое, што адбылося з яе гадаванцамі ў Бранскай вобласці Расіі.
У Следчым камітэце Расіі кажуць, што ў аўтобусе былі 44 пасажыры, сярод якіх 28 дзяцей-спартоўцаў.
