ЗША зноў нанеслі ўдар па Іране

ЗША зноў нанеслі серыю ўдараў па Іране. Гэта было зроблена ў адказ на атакі на тры гандлёвыя караблі каля Армузскага праліва. Акрамя таго, Штаты забаранілі Тэгерану прадаваць нафту, перадае Бі-Бі-Сі.

У ЗША заявілі, што пацэлілі па больш як 80 аб'ектах — сістэмах СПА, пунктах кіравання, берагавых радыёлакацыйных станцыях, супрацькарабельных ракетных комплексах і малых катэрах Корпуса вартавых ісламскай рэвалюцыі. Амерыканскія медыя заяўляюць, план удараў па Іране ўхваліў Трамп і аддаў загад правесці атаку. Сам прэзідэнт Злучаных Штатаў гэтым часам перабывае на саміце NATO ў Турцыі.

У Іране тым часам заяўляюць, што нанясуць "скрышальны ўдар у адказ на агрэсію" і не дапусцяць умяшання ў кіраванне Армузскім пралівам.

Зранку ў сераду войска Кувейта паведаміла, што іх сістэмы СПА адбіваюць ракетныя і беспілотныя атакі. Таксама ёсць звесткі, што іранскія вайскоўцы атакавалі беспілотнікамі Бахрэйн.