Украіна мяркуе, што мае падтрымку Трампа, каб больш смела дзейнічаць супраць Расіі — СМІ

Афіцыйны Кіеў мяркуе, што мае падтрымку Белага дома ў прымушэнні Расіі да перамоваў. У прыватным парадку Дональд Трамп заклікаў Уладзіміра Зяленскага дзейнічаць "больш смела". Пра гэта ў гутарцы з выданнем Kyiv Independent сказаў высокапастаўлены ўкраінскі чыноўнік.

Гэтае паведамленне было агучана ў час, калі Кіеў актывізуе намаганні па сустрэчы паміж Зяленскім і Пуціным. Ідэю такой сустрэчы падтрымлівае Трамп, але Крэмль імкнецца ўхіліцца ад яе.

"Трамп кажа, што ён не верыць, што Пуцін зробіць што-небудзь без ціску", — цытуе выданне словы чыноўніка пра нядаўнюю сустрэчу Трампа і Зяленскага.

Амерыканскія чыноўнікі не пацвердзілі, што Трамп падтрымлівае ўкраінскія ўдары па тэрыторыі Расіі, але заявілі, што прэзідэнт ЗША лічыць сілу ключавым фактарам: "Прэзідэнт (Трамп) верыць у мір праз сілу".

Зяленскі выказаў гатоўнасць сустрэцца з Пуціным у нейтральнай краіне. Аднак Крэмль настойвае на ягоным прыездзе ў Расію.

Падчас сустрэчы 16 чэрвеня Зяленскі прапанаваў Трампу арганізаваць саміт у ЗША з удзелам прэзідэнтаў Украіны і Расіі. На думку Кіева, ад такога запрашэння Пуціну адмовіцца будзе складана.

Амерыканскія чыноўнікі, знаёмыя з перамовамі, пацвердзілі Kyiv Independent, што Кіеў зрабіў такую ​​прапанову. Але яны дадалі, што ў найбліжэйшай будучыні такая сустрэча не адбудзецца.