Аўтобус з Мінска на восем гадзін затрымаў чаргу на польскай мяжы

Рэйс з Мінска (а за ім і ўсе астатнія аўтобусы) амаль восем гадзінаў прастаяў на польскай мяжы, бо ў пасажыра знайшлі мяса, заўважыла выданне MOST.

Паводле правілаў Еўрасаюза, увоз мяса і малочных прадуктаў з-за межаў ЕС забаронены — нават у невялікіх колькасцях. Такія тавары канфіскоўваюцца, а парушальніка могуць яшчэ і аштрафаваць.

Так адбылося і ў гэтым выпадку. Мужчыну, у якога знайшлі забароненую прадукцыю, прызначылі штраф — 3000 злотых (каля 800 долараў). Аднак, як сцвярджаюць відавочцы, ён адмаўляўся плаціць.

Праз гэта ўвесь аўтобус чакаў і не мог ехаць далей. Людзі некалькі гадзінаў заставаліся ўнутры закрытага салона. "Папрасілі маму з грудным дзіцем пайсці і папрасіць адпусціць яго і ўвесь аўтобус. Кіроўцы таксама паступілі дзіўна і непаважліва да іншых пасажыраў — яго трэба было высадзіць", — скардзіцца адзін з пасажыраў.

Аўтобус выехаў з Мінска 18 ліпеня ў 22:45, а польскую мяжу змог прайсці толькі раніцай наступнага дня — каля 11:30. Якую менавіта прадукцыю знайшлі ў пасажыра, не ўдакладняецца.