Вучэбна-палявыя зборы школьнікаў маскіруюцца пад аздараўленчыя лагеры — BELPOL

Вучэбна-палявыя зборы для беларускіх школьнікаў маскіруюцца пад аздараўленчыя лагеры. Гэта вынікае з дакументаў, якія абнародавала арганізацыя былых сілавікоў BELPOL.

На сайце арганізацыі апублікаваны загад упраўлення па адукацыі Магілёўскага гарвыканкама "Аб арганізацыі і правядзенні вучэбна-палявых збораў і медыцынскай практыкі ў 2026 годзе". У дакуменце бачна, як спалучаюцца школьная адукацыя і элементы вайсковай арганізацыі.

Хаця лагер называецца аздараўленчым, пры гэтым пастаянна выкарыстоўваюцца выразы "вучэбна-палявыя зборы", "ваенна-патрыятычны профіль", "страявая падрыхтоўка", "ваенна-тактычныя заняткі".

"Атрымліваецца своеасаблівая канструкцыя: юрыдычна — дзіцячы аздараўленчы лагер, фактычна — пляцоўка для дапрызыўнай падрыхтоўкі", — канстатуюць у BELPOL.

Рэжым у такім "аздараўленчым лагеры" максімальна набліжаны да ваеннага распарадку.
У ім прадугледжаныя наступныя дысцыпліны:
страявая падрыхтоўка;
ваенна-тактычная падрыхтоўка;
ваенная гісторыя;
фізічная падрыхтоўка;
медыцынская падрыхтоўка;
наведванне ваеннай часці;
вячэрняя праверка;
адбой.

Падчас наведвання ваеннай часці школьнікам паказваюць узбраенне, ваенную тэхніку, задачы часці, арганізацыю службы, нормы паводзін ваеннаслужачых, парадак размяшчэння асабістага складу, распарадак паўсядзённай дзейнасці. "Фактычна падлеткаў знаёмяць не столькі з гісторыяй арміі, колькі з яе сучаснай арганізацыяй і паўсядзённым жыццём. Гэта ўжо не патрыятычная экскурсія ў звыклым разуменні, а дэманстрацыя функцыянавання ваеннага арганізма", — падкрэсліваюць у BELPOL.

Выклікае цікавасць і форма справаздачнасці. Школы павінны паведаміць наступныя звесткі:
колькі навучэнцаў вывучалі дапрызыўную падрыхтоўку;
колькі прайшлі практычную стральбу;
колькі ўдзельнічалі ў вучэбна-палявых зборах;
ці ёсць ціры;
ці ёсць пнеўматычныя вінтоўкі;
ці ёсць макеты аўтаматаў Калашнікава;
ці ёсць супрацьгазы;
як абсталяваныя кабінеты дапрызыўнай падрыхтоўкі;
хто з'яўляецца выкладчыкам прадмета.

Сёлета ў Беларусі было запланавана 138 летнікаў "ваенна-патрыятычнага" профілю.