У трох раёнах Беларусі пройдуць грамадскія абмеркаванні пункту захавання ядзерных адходаў

Грамадскія абмеркаванні па пабудове пункту захавання ядзерных адходаў і яго ўплыве на навакольнае асяроддзе пройдуць у Беларусі.

Іх правядуць у трох раёнах Беларусі, дзе разглядаецца магчымасць будаўніцтва аб'екта — Астравецкім, Мсціслаўскім і Хойніцкім.

У Астраўцы сход адбудзецца ў чацвер, 20 жніўня. Ён пачнецца а 14-й у канферэнц-зале цэнтра творчасці моладзі (прасп. Энергетыкаў, 2).

Сход у Мсціславе прызначаны на 26 жніўня, гэта будзе серада. Ён таксама пачнецца а 14-й у зале Мсціслаўскага райвыканкама (вул. Калініна, 21).

У Хойніках абмеркаванне прызначылі на чацвер, 10 верасня, таксама на 14-ю гадзіну. Сход адбудзецца ў філіяле гарадскога Цэнтра культуры на вул. Калесніка, 13.

Прыняць удзел у сходах могуць грамадзяне, індывідуальныя прадпрымальнікі ды прадстаўнікі юрыдычных асоб. Яны могуць задаць пытанні спецыялістам, азнаёміцца з нюансамі праекта і выказаць свае заўвагі.