Польская разведка спрабуе дамовіцца з РБ пра выдачу мігранта, які забіў памежніка
Момант ранення Сітэка на беларуска-польскай мяжы / wiadomosci.wp.pl
Агенцтва разведкі Польшчы падтрымлівае кантакты з афіцыйным Мінскам. І адна з галоўных яго задач на сёння — выдача грамадзяніна Марока, якога падазраюць у смяротным раненні салдата Матэвуша Сітэка на мяжы. Пра гэта расказаў польскім журналістам кіраўнік Агенцтва разведкі палкоўнік Павел Шота, заўважыла выданне MOST.
"На цяперашні момант у нас ёсць дзейныя каналы камунікацыі са службамі беларускага боку. Мы самі іх падтрымліваем", — падкрэсліў Шота.
Ён заявіў, што разведка стварае каналы дыялогу там, дзе праца дыпламатыі ўскладненая. Кантакты з беларускім бокам, паводле Шоты, патрэбныя для бяспекі Польшчы і для таго, каб процідзейнічаць поўнаму падпарадкаванню Беларусі Расіі.
Польская разведка дамагаецца экстрадыцыі грамадзяніна Марока Махамеда Аддамроу. Палякі падазраюць, што гэта ён нанёс смяротнае раненне польскаму вайскоўцу Матэвушу Сітэку на мяжы 28 траўня 2024 года. Праз некалькі дзён пасля ранення салдат памёр у шпіталі ў Варшаве.
Польская пракуратура сцвярджае, што Махамед Аддамроу хаваецца на тэрыторыі Беларусі. У снежні 2025 года афіцыйная Варшава накіравала ў Мінск запыт пра яго арышт і экстрадыцыю, але адказу не атрымала.
Таксама Шота звярнуў увагу на ваенную супрацу Беларусі і Расіі. РФ, паводле яго, рыхтуе інфраструктуру і пастаўляе ўзбраенне, здольнае несці ядзерную зброю. Кіраўнік разведкі падкрэсліў, што сама падрыхтоўка інфраструктуры прымушае "ставіцца да гэтых пытанняў сур'ёзна".
