Цэнтры расійскай тэлеграм-прапаганды перанеслі з Прыднястроўя ў Беларусь — Кулік

У Беларусь з Прыднястроўя перанеслі адміністраванне сеткі тэлеграм-каналаў, якія займаюцца прапагандай, а таксама пошукам і вярбоўкай за грошы людзей для дыверсій супраць Украіны. Пра гэта паведамілі на міжнародным круглым стале "Беларускі чыннік у сістэме еўрапейскай бяспекі: як не дапусціць адкрыцця новага фронту расійскай агрэсіі". Гэтае мерапрыемства прайшло ў Кіеве, перадае Радыё Свабода.

"Там разгортваецца цэлая экасістэма адміністравання тэлеграм-каналаў ды іншых сацыяльных сетак, якія выкарыстоўваюцца для пошуку людзей, якіх за грошы спрабуюць выкарыстоўваць у тэрарыстычных атаках супраць Украіны, а таксама распаўсюджваюць прапагандысцкія наратывы. Ёсьць такія інфармацыйныя хабы, генерацыі паведамленняў, і яны знаходзяцца ў Беларусі", — сказаў загадчык навучальна-навуковай лябараторыі супрацьдзеяньня дэзінфармацыі Кіеўскага нацыянальнага эканамічнага ўнівэрсітэта Віталь Кулік.

Таксама ён расказаў, што Расія выкарыстоўвала рэтранслятары на тэрыторыі Беларусі для атакі Жытомірскай і Ровенскай абласцей украіны. Удары наносіліся па шляхах дастаўкі замежнай ваеннай дапамогі з Заходняй украіны на фронт.

"То бок яны імкнуцца выбіць транспартныя вузлы, ідзе паляванне на рухомы састаў чыгункі. Ціск перманентны", — падкрэсліў Кулік.

Паводле яго, Украіна хоча спыніць дзеянне гэтых рэтранслятараў і зменшыць (магчыма, паэтапна) ступень удзелу Беларусі ў вайне.

У сустрэчы ўзялі ўдзел эксперты з Украіны, Літвы, Латвіі, Польшчы, а таксама прадстаўнікі дэмакратычных сіл Беларусі.