Офіс Ціханоўскай прыпыніў супрацу з Алінай Харысавай

— Дадзеная камунікацыя груба парушае ўнутраныя пратаколы бяспекі, якія дзейнічаюць у Офісе. У сувязі з гэтым была прызначана і праведзена праверка, падчас якой спецыялістам па бяспецы не было выяўлена пацвярджэнняў перадачы якой-небудзь адчувальнай, службовай або непублічнай інфармацыі, здольнай нанесці шкоду дзейнасці Офіса, бяспецы яго супрацоўнікаў і супрацоўніц, партнёраў, а таксама беларусаў і беларусак, якія звярталіся па дапамогу.

Аналіз ОСЦ не пацвердзіў фактаў перадачы ўнутраных дакументаў або іншых закрытых звестак, а таксама атрымання ўзнагароджання за меркаванае супрацоўніцтва.

Праверка аўдыязапісаў і скрыншотаў, якія выкарысталі прапагандысты ў сваіх матэрыялах, паказала, што істотная частка з іх утрымлівае прыкметы генерацыі з выкарыстаннем тэхналогій штучнага інтэлекту, “што ставіць пад сумнеў іх сапраўднасць”.

У ОСЦ адзначаюць, ціск з боку спецслужбаў у дачыненні да Харысавай і падобныя абставіны не могуць разглядацца як падстава для адступлення ад устаноўленых правілаў бяспекі.

— На дадзены момант удзел Аліны Харысавай у любой дзейнасці Офіса прыпынены. Праверка па дадзеным інцыдэнце працягваецца. У Офісе будуць перагледжаны дзеючыя пратаколы бяспекі і праведзены дадатковыя трэнінгі для супрацоўнікаў і супрацоўніц, а таксама валанцёраў і асоб, якія ўзаемадзейнічаюць з Офісам у рамках экспертнай і кансультатыўнай дзейнасці.

Гэты выпадак пацвярджае неабходнасць пастаяннага ўдасканалення мер бяспекі і дэманструе працяглыя спробы беларускіх спецслужбаў выкарыстоўваць ціск, правакацыі, лічбавыя маніпуляцыі і сучасныя тэхналогіі для атак на прадстаўнікоў дэмакратычных сіл, — гаворыцца ў заяве ОСЦ.