"Не рызыкуйце жыццём — не едзьце ў Расію" — Ціханоўская

"Маё сэрца з усімі пацярпеўшымі і іх родным. Дзеці і дарослыя, што былі побач з імі, — невінаватыя ахвяры". Так Святлана Ціханоўская адгукнулася на інцыдэнт з беларускім аўтобусам, які трапіў пад дронавую атаку ў Бранскай вобласці.

Як паведамлялася раней, аўтобус, у якім ехалі юныя футбалісты з рэчыцкай дзіцяча-юнацкай спартовай школы №2, трапіў пад абстрэл дронаў. Пры гэтым загінула жонка трэнера, якая суправаджала юных спартоўцаў. У лякарню трапілі сем чалавек, у тым ліку чацвёра дзяцей. Адзін з пацярпелых быў дастаўлены ў цяжкім стане, астатнія — у сярэднім.

Ціханоўская нагадала, што менавіта Расія пачала вайну і нясе галоўную адказнасць як агрэсар. Але нельга здымаць адказнасць і з тых беларусаў, якія запланавалі менавіта такі маршрут для дзіцячай паездкі — праз прыфрантавую Бранскую вобласць у Краснадарскі край.

"Гэта не "выпадковасць", а канкрэтнае рашэнне канкрэтных людзей пры ўладзе, якія абыякава аднесліся да таго, як дзеці патрапяць на адпачынак. І вінаватая беларуская дзяржаўная прапаганда, якая гадамі замоўчвае праўду пра вайну і саўдзел у ёй рэжыму Лукашэнкі, каб стварыць фэйкавую карцінку "мірнага неба" і бяспекі", — падкрэсліваецца ў заяве лідаркі беларускіх дэмакратычных сілаў.

Ціханоўская заклікае беларусаў берагчы сябе і сваіх блізкіх: "Не рызыкуйце жыццём — не едзьце ў Расію, якая вядзе злачынную і несправядлівую вайну. Бяспека надыдзе толькі тады, калі Расія спыніць гэтую вайну".