"Няма чаго анансаваць" — у Дзярждэпе адказалі пра вызваленне беларускіх палітвязняў

Візіту амерыканскай дэлегацыі ў Мінск, які чакаўся ў чэрвені, не будзе. Звычайна пасля такіх візітаў адбывалася вызваленне палітвязняў. Пра тое, што яго не будзе, Радыё Свабода даведалася ад некалькіх праваабарончых арганізацыяў.

Раней перад вызваленнем палітвязняў адбывалася падрыхтоўка і кансультацыі, у якіх удзельнічалі ў тым ліку праваабаронцы. Цяпер гэтага няма.

На пачатку чэрвеня інфармагенцтва Reuters апублікавала каментар Святланы Ціханоўскай, што яна ведае прычыну затрымкі ў вызваленні новай групы палітвязняў. Джон Коўл 10 чэрвеня адказаў адмоўна на пытанне журналіста Дзмітрыя Гурневіча ў сацсетцы Х, ці сапраўды працэс вызвалення беларускіх палітвязняў прыпынены. Аднак на пытанне пра свой візіт у Мінск адказваць не стаў.

Радыё Свабода папрасіла Дзяржаўны дэпартамэнт ЗША пракаментаваць паведамленне Reuters аб прыпыненні вызвалення палітвязняў, а таксама спытала, калі Джон Коўл наведае Мінск. Прэс-сакратар Дзярждэпа адказаў, што ведамству "на гэты момант няма чаго анансаваць".

Паводле падлікаў праваабарончага цэнтру "Вясна", цяпер за кратамі застаюцца 869 палітвязняў. Не менш за 170 чалавек праваабаронцы лічаць асабліва ўразлівымі праз узрост, стан здароўя або цяжкія ўмовы ўтрымання. Праваабарончая ініцыятыва "Дысідэнты" лічыць палітзняволенымі 939 чалавек.