Лукашэнка: Беларусь пры патрэбе здольная супрацьстаяць любому агрэсару

Беларусь, нягледзячы на міралюбівы характар яе знешняй палітыкі, пры неабходнасці здольная супрацьстаяць любому агрэсару. Такую заяву зрабіў Аляксандр Лукашэнка перад выпускнікамі ваенных навучальных установаў Беларусі і Расіі.
Кіраўнік дзяржавы спаслаўся на "гістарычны досвед беларускага народа", які разам са "свядомым выбарам свайго шляху развіцця" патрабуе пільнасці і "пастаяннага клопату аб бяспецы дзяржавы". Ён падкрэсліў, што "незалежнасць дзяржавы мусіць быць надзейна абароненая нашай арміяй". Пры гэтым Лукашэнка назваў яе "народнай", паведамляе "Интерфакс".

Звяртаючыся да выпускнікоў ваенных ВНУ, кіраўнік дзяржавы заявіў, што падчас сваёй службы яны мусяць праводзіць у войску ідэалогію беларускай дзяржавы, а таксама ўдзельнічаць у патрыятычным выхаванні насельніцтва.