Чаго дамагаецца Украіна, знішчаючы склады Wildberries? І што на чарзе?

22 ліпеня 2026 года Узброеныя сілы Украіны знішчылі яшчэ два буйныя лагістычныя хабы расійскага маркетплэйса Wildberries. Усяго ж за тыдзень было спалена пяць аб'ектаў.

Чаму УСУ заняліся знішчэннем складоў, як гэта паўплывае на эканоміку Расіі і яе здольнасць працягваць вайну, а таксама па якіх яшчэ цэлях можа ўдарыць Украіна?

Еўрарадыё распытала пра гэта ваеннага аналітыка і эканамічнага аглядальніка.

Wildberries, які працуе на вайну

Ваенны эксперт, аглядальнік групы "Інфармацыйны супраціў" Аляксандр Каваленка ў каментары для Еўрарадыё адзначыў, што ўдары па складах Wildberries уплываюць на забеспячэнне расійскай арміі рэсурсамі і на расійскую эканоміку.

— Праз страту толькі аднаго лагістычнага вузла гэтага маркетплэйса расійскі бок, паводле наяўных ацэнак, страціў больш за 100 мільярдаў рублёў. Гэта сур'ёзны ўдар па малым і сярэднім бізнесе, які сваімі падаткамі таксама папаўняе бюджэт, а значыць — удзельнічае ў фінансаванні вайны.

Другі аспект мае ўжо ваенны характар. Праз маркетплэйс Wildberries ажыццяўляюцца пастаўкі рознай прадукцыі: FPV-дронаў, камплектуючых да іх, акумулятараў, аптычнага валакна, бронекамізэлек, іншага ваеннага рыштунку. А таксама — тавараў двайнога прызначэння, якія выкарыстоўваюцца для вытворчасці прадукцыі ў інтарэсах расійскай арміі.

Wildberries быў важным маркетплэйсам і лагістычным вузлом, які забяспечваў малы і сярэдні бізнес у Расіі, перш за ўсё прадукцыяй з Кітая, частка якой выкарыстоўвалася ў вайне супраць Украіны, — лічыць аглядальнік.

Два ўдары па складах за пяць дзён — гэта ўжо сістэма? А па якіх яшчэ аб'ектах у Расіі можна чакаць удараў? Каваленка лічыць, што на чарзе — энергетычная інфраструктура.

— Што датычыцца саміх удараў, то, безумоўна, яны будуць працягвацца. Я думаю, што яны стануць больш сістэмнымі і маштабнымі. Амаль кожную ноч або праз пэўныя прамежкі часу будуць наносіцца новыя ўдары па лагістычных цэнтрах і маркетплэйсах Wildberries.

Гэта будзе працягвацца да таго часу, пакуль не будуць паражоны ўсе аб'екты, якія знаходзяцца ў зоне дасяжнасці дронаў Сіл беспілотных сістэм Украіны.

Пасля гэтага, верагодна, увага будзе засяроджана на іншых аб'ектах. Гэта могуць быць газатранспартная і газаразмеркавальная сістэмы, а таксама энергетычная інфраструктура, асабліва ў асенне-зімовы перыяд. То-бок удары па тэрыторыі Расійскай Федэрацыі не будуць абмяжоўвацца толькі Wildberries.

Удар па эканоміцы

Важна таксама, што пагаршэнне лагістыкі негатыўна ўплывае на эканоміку ў цэлым.

— Прыкладна за тыдзень да гэтых удараў Wildberries змяніў умовы дамовы, прадугледзеўшы, што ў выпадку форс-мажорных абставін, у тым ліку налётаў дронаў, кампанія не будзе выплачваць кампенсацыі. Гэта значыць, тыя больш як 100 мільярдаў рублёў страт, якія панеслі прадпрымальнікі ў першы дзень, ім ніхто не кампенсуе.