Ад выбуху ў малочнай цыстэрне ў Лідзе загінуў рабочы
Малочная цыстэрна / Следчы камітэт
У Лідзе ад выбуху ў малочнай цыстэрне загінуў рабочы. Трагедыя здарылася пры канцы траўня, але Следчы камітэт паведаміў пра яе толькі цяпер.
Выбух адбыўся ў рамонтнай майстэрні адной з транспартных кампаній, калі 52-гадовы зваршчык займаўся зварачнымі работамі ўнутры малочнай цыстэрны. Ад выбуху ён загінуў на месцы, а яго 23-гадовы напарнік атрымаў лёгкія траўмы.
Паводле следчых, 63‑гадовы начальнік рамонтнай майстэрні адправіў рабочых праводзіць зварку без афармлення нараду‑допуску і без правядзення абавязковай дэгазацыі. Перад гэтым у цыстэрне мантажнай пенай ліквідавалі працёк, але не правялі аналіз паветра на наяўнасць выбухованебяспечных рэчываў.
На начальніка майстэрні пачалі крымінальную справу за парушэнне правілаў аховы працы, якое пацягнула па неасцярожнасці смерць чалавека. Расследаванне працягваецца.
