Не перашкаджайце Украіне збіваць расійскія рэтранслятары — Статкевіч

Для беларускіх уладаў важна не ўцягнуцца ў вайну, калі Украіна нанясе ўдар па расійскіх рэтранслятарах. Пра гэта заявіў у сваім тг-канале Мікалай Статкевіч. Палітык заклікаў Аляксандра Лукашэнку не збіваць украінскія дроны і ракеты, калі яны паляцяць на рэтранслятары.

"Зенітных ракет мала, і яны дарагія, а галоўнае: навошта збіваць тое, што ляцяць да расійскіх рэтранслятараў? Толькі, каб абломкі тых украінскіх дронаў ці беларускіх зенітных ракет падалі на галовы мірнага насельніцтва?
І ўжываць беларускія сродкі радыёэлектроннай барацьбы таксама не варта — невядома куды паляціць збітая з маршруту ракета ці дрон.
Карацей, калі Пуцін адмовіцца прыбраць свае рэтранслятары, то іх прыбярэ Зяленскі. Тутэйшыя ўлады могуць нават перадаць апошняму: прыбірай, замінаць не будзем. Толькі далей біць не трэба. Як у тым анекдоце: "Ды чаго ўжо там — ляпі!"

На думку Статкевіча, галоўная задача беларускіх уладаў — захаваць сваіх суграмадзян і не даць яшчэ больш уцягнуць нашу краіну ў чужую вайну. Для гэтага ён прапануе наладзіць сістэму апавяшчэння насельніцтва:

"Думаю, што ў любым выпадку трэба наладзіць сістэму апавяшчэння грамадзянаў аб паветранай пагрозе ў паласе ад украінскай мяжы да гэтых рэтранслятараў, абавязаць мясцовыя ўлады і вясковае насельніцтва ў гэтай паласе абсталяваць бамбасховішчы, хоць у падвалах шматкватэрных дамоў ці нават ва ўласных склепах".

Увечары ў пятніцу, 19 чэрвеня, Уладзімір Зяленскі паставіў Лукашэнку ультыматум — запатрабаваў цягам тыдня прыбраць рэтранслятары, якія накіроўвалі расійскія дроны для ўдару па Украіне. У іншым разе ўкраінскі бок паабяцаў разабрацца з рэтранслятарамі самастойна. Пазней Зяленскі ўдакладніў, што Украіна ведае пра чатыры такія рэтранслятары — у Гомельскай і Брэсцкай абласцях.

У інтэрв'ю, якой выйшла ва Украіне 21 чэрвеня, ён расказаў, што спярша Кіеў спрабаваў развязаць гэтую праблему па неафіцыйных каналах. Зяленскі дадаў, што гаворка ідзе не проста пра палітычную падтрымку Расіі, а пра тэхнічную дапамогу ўдарам: "Гэтыя сістэмы выкарыстоўваюцца для каардынацыі і дапамагаюць расійскім і іранскім дронам наносіць больш дакладныя ўдары па Украіне. Вось пра што ідзе гаворка".

Украінскі прэзідэнт расказаў, што такія сігналы перадаваліся афіцыйнаму Мінску неаднаразова, таму Кіеў вырашыў зрабіць папярэджанне публічным.