Падлетка, цяжка траўмаванага пры атацы ў Бранскай вобласці, чакае яшчэ адна аперацыя

Падлетак, найбольш пацярпелы падчас дронавай атакі ў Бранскай вобласці, застаецца ў рэанімацыі, але яго стан удалося стабілізаваць.

Раней яго трымалі на апараце штучнай вентыляцыі лёгкіх. Цяпер хлопчык прыйшоў у прытомнасць і дыхае самастойна. У аўторак яго чакае яшчэ адна аперацыя — па пластыцы левай кісці, паведамілі медыкі ў эфіры дзяржаўнага тэлеканала СТБ.

Папярэднюю аперацыю падлетку рабілі некалькі дзён таму. "Выконваліся чатыры хірургічныя ўмяшанні на розных абласцях анатамічных цела. Падчас аперацыі былі выдаленыя множныя аскепкі ад выбуховай траўмы. Была выкананая рэканструкцыя і стабілізацыя кісці і рэвізія множных ран мяккіх тканак", — расказаў у тэлеэфіры хірург РНПЦ дзіцячай хірургіі Андрэй Запалянскі.

Побач з хлопчыкам пастаянна знаходзіцца яго маці Наталля Польская. Яна была ў аўтобусе і падчас атакі. Жанчына кажа, што для дастаўкі сына да медыкаў спыніла папутку: "Хуткай не было, рана сур'ёзная, страта крыві вялікая была. Мы паехалі ў першы населены пункт, там аказалі першую дапамогу".

Паўторныя аперацыі чакаюць і мужчыну, пацярпелагацяжка траўмаванага падчас атакі. "Ёсць цяжкая траўма, аперацыі былі выкананыя своечасова, тым не менш заўсёды ёсць верагоднасць развіцця ўскладненняў. Там цяжкая траўма жывата ўжо праапераваная, цяжкая выбуховая траўма кісці, якая патрабуе неаднаразовых аперацый паўторных", — падзяліўся падрабязнасцямі хірург 432-га Галоўнага ваеннага клінічнага медцэнтра Узброеных Сіл Аляксей Трухан.

Трагедыя адбылася 17 чэрвеня ў Бранскай вобласці РФ, за 45 км ад мяжы з Украінай. Расійскія афіцыйныя органы паведамілі, што ў аўтобус з беларускай дзіцячай футбольнай камандай з Рэчыцы пацэліў дрон. Пацярпелі шэсць чалавек; загінула жанчына —жонка трэнера.

Расійскія і беларускія ўлады вінавацяць ва ўдары украіну. Генштаб УСУ адмаўляе датычнасць да ўдару па аўтобусе.