Пэўная колькасць накіпу ў чайніку неабходная — кіраўнік "Мінскводаканала"

Якасць вады ў Мінску цалкам адпавядае ўсім патрабаванням, якія вызначае заканадаўства. Пра гэта ў эфіры "Радыё-Мінск" заявіў дырэктар "Мінскводаканала" Фёдар Рымашэўскі.

Выкарыстанне фільтраў для ачысткі вады ён назваў данінай модзе і маркетынгам. Паводле яго, у вадзе ў мінскіх кранах ёсць "неабходныя арганізму мінералы".

"У мяне фільтра няма і ніколі не было. Калі казаць пра маіх знаёмых, сваякоў, сяброў, то фільтрамі не карыстаецца ніхто. Гэта даніна модзе. Гэта, я думаю, маркетынг, таму што падстаў ўсталёўваць фільтры няма. Як я ўжо казаў раней, вада ва ўсіх раёнах сталіцы адпавядае ўсім патрабаванням і нормам", — перадае "Зеркало" словы Рымашэўскага.

Пракаментаваў ён і асадак, які застаецца ў чайніку пасля кіпячэння вады. Паводле Рымашэўскага, пэўная колькасць накіпу проста неабходная: "Недахоп мінералаў, недахоп соляў у вадзе можа прывесці да парушэння працы арганізма. Таму наяўнасць калянасці ў вадзе — гэта нармальны паказчык".