На Беларускім радыё раптоўна прыпынілі трансляцыю каталіцкага набажэнства

Ужо тры тыдні запар на Першым нацыянальным канале беларускага дзяржаўнага радыё няма трансляцыі імшы з Мінскага архікатэдральнага касцёла, заўважыла выданне katolik.life.

Раней такая трансляцыя адбывалася кожную нядзелю ў 8:15. У праграме перадач на гэты час пазначана "Каталіцкая пропаведзь", але ў эфіры гучыць "Тэматычная рубрыка". Напрыклад, 12 ліпеня замест імшы ў эфіры гучала класічная музыка.

Гэта стала непрыемным сюрпрызам для многіх нехадзячых вернікаў, якія не могуць дабрацца да касцёла. З мінскага архікатэдральнага і іншых беларускіх касцёлаў вядзецца відэа-трансляцыя ў інтэрнэце, але многія пажылыя людзі не карыстаюцца інтэрнэтам.

У парафіі архікатэдральнага касцёла не ведалі, што трансляцыя набажэнства ўжо не вядзецца. Парафіяне кажуць, што дзеля эфіру службу ў 8:15 праводзяць літаральна з дапамогай секундамера — каб укласціся ў адведзены на радыё час. Гэтаксама так працягвалі адпраўляць імшу папярэднія тры тыдні, калі радыётрансляцыі не было.

Каб даведацца прычыны адмены, вернікі спрабавалі датэлефанавацца па нумарах радыё, пазначаных у інтэрнэт-даведніках і пісалі ў сацсетках радыёстанцыі. Аднак адказу нідзе не атрымалі.

Дарэчы, праваслаўная перадача "Духоўнае слова" па-ранейшаму гучыць у эфіры радыё.