Галоўрэд гомельскай раёнкі абвінаваціла гурт "Дразды" ў здрадзе, а потым выбачылася

Галоўная рэдактарка газеты Гомельскага райвыканкама "Маяк" Вікторыя Футрына запісала відэа з выбачэннямі на адрас гурта "Дразды".

Раней прапагандыстка абурылася выступам музыкаў на святкаванні Дня незалежнасці ў Гомелі і абвінаваціла іх у "здрадзе" ў 2020-м.

Лідар гурта Віталь Карпанаў спярша напісаў у сацсетках, што чакае выбачэнняў. А праз нейкі час апублікаваў на сваёй старонцы відэаролік. У ім Футрына кажа:

"Пасля нядаўняй маёй аўтарскай калонкі ў сетцы паднялася вялікая хваля негатыву. Я звязалася з салістам гурта "Дразды" — таго самага, які я абвінаваціла ў "няправільнай" пазіцыі ў 2020-м, — каб разабрацца ў сітуацыі. І на самай справе словы, сказаныя мною на іх адрас, аказаліся не да канца праверанай інфармацыяй, па сутнасці — хлуснёй, і абразілі артыстаў".