Пракуратура Латвіі пачала крымінальную справу на беларускіх памежнікаў
Мяжа Латвіі / Дзяржаўная памежная ахова Латвіі
Генпракуратура Латвіі пачала крымінальную справу па факце меркаваных злачынных дзеянняў службовых асоб пагранічных структур Беларусі. Пра гэта паведамляе прэс-служба ведамства.
Падставай для крымінальнай справы стаў зварот Дзяржаўнай памежнай аховы ад 13 ліпеня. Ведамства заявіла, што працяглы і сістэматычны міграцыйны ціск на мяжы з Беларуссю доўжыцца са жніўня 2021 года.
Афіцыйная Рыга адзначае, што гэта не асобныя спробы нелегальнага перасячэння мяжы мігрантамі, а "мэтанакіраваная дзейнасць злачыннай арганізацыі, у якую ўваходзяць службовыя асобы беларускіх памежных структур". Следства мяркуе, што прадстаўнікі беларускіх памежнікаў каардынавалі незаконную перапраўку людзей праз латвійскую мяжу, а таксама займалася пашкоджаннем інфраструктуры памежнай аховы.
Латвійска-беларуская мяжа сёлета стала асноўным пунктам, да якога накіроўваюцца плыні нерэгулярных мігрантаў. Як падлічыла выданне "Позірк", ад пачатку года на мяжы з Латвіяй было зафіксавана 8069 спробаў незаконнага пераходу мяжы. Гэта 87,2% ад агульнай колькасці нелегальных пераходаў мяжы Беларусі з краінамі Еўрасаюза.
Міграцыйны крызіс на мяжы Беларусі і краін ЕС працягваецца з вясны 2021 года.
