У Музеі Грунвальскай бітвы сказалі пра магчымасць паставіць бел-чырвона-белы сцяг

Пакуль што паставіць флагшток з бел-чырвона-белым сцягам на полі Грунвальскай бітвы немагчыма. Пра гэта гаворыцца ў афіцыйным адказе дырэкцыі Музея Грунвальдскай бітвы, які атрымаў Аб'яднаны пераходны кабінет (АПК) 15 ліпеня.

Для ўстаноўкі дадатковага флагштока трэба прайсці адміністрацыйныя працэдуры і атрымаць шэраг дазволаў, піша ў сваім лісце дырэктар музея Шыман Дрэй. Ён дадае, што поле Грунвальдскай бітвы з прычыны сваёй гістарычнай значнасці знаходзіцца пад асаблівай аховай Вармінска-Мазурскага ваяводскага ўпраўлення аховы помнікаў.

"У адказ на Ваш зварот мы правялі папярэднюю кансультацыю з Ваяводскім упраўленнем аховы помнікаў, і з прыкрасцю вымушаны паведаміць, што на дадзены момант няма магчымасці ўсталяваць дадатковы флагшток на пагорку з помнікам", — гаворыцца ў лісце.

Разам з тым у Музеі Грунвальдскай бітвы падкрэслілі, што цалкам салідарызуюцца з усімі імкненнямі беларусаў да свабоды і захавання ўласнай гістарычнай ідэнтычнасці.

Як распавядала Еўрарадыё, беларусы збіраюць подпісы пад петыцыяй за ўстаноўку бел-чырвона-белага сцяга на Грунвальдскім полі. Цяпер там стаяць сцягі Польшчы, Літвы і Украіны. Свае звароты ў падтрымку гэтай ініцыятывы даслалі таксама кіраўніца АПК Святлана Ціханоўская, намеснік кіраўніцы АПК, кіраўнік НАУ Павел Латушка і прадстаўнік АПК па нацыянальным адраджэнні Павел Баркоўскі.

Каментуючы адказ музея, Павел Латушка заявіў: "Я спадзяюся, што кіраўніцтва Ваяводскага ўпраўлення аховы помнікаў прыме станоўчае рашэнне, і ў будучыні бел-чырвона-белы сцяг будзе лунаць над Грунвальдскім полем і на ўсіх урачыстых мерапрыемствах, прысвечаных гэтай гістарычнай перамозе. Мы таксама накіруем ліст у Ваяводскае ўпраўленне аховы помнікаў з просьбай узгадніць неабходныя працэдуры і выдаць дазвол на ўсталяванне сцяга".