З беларускіх гандбалістаў знялі міжнародныя санкцыі

Міжнародная федэрацыя гандбола зняла санкцыі з Беларусі і Расіі. Арганізацыя спаслалася на адпаведныя рашэнні выканкама Міжнароднага алімпіскага камітэта.

Цяпер зборныя Беларусі і Расіі могуць удзельнічаць у міжнародных спаборніцтвах пад дзяржаўным сцягам і з гімнам. Рашэнне закранае не толькі каманды, але і афіцыйных асоб, суддзяў, лектараў і экспертаў.

Пры гэтым у гандбольнай федэрацыі падкрэслілі салідарнасць з Украінай: "IHF пацвярджае сваю даўнюю прыхільнасць Федэрацыі гандбола Украіны і працягвае выказваць салідарнасць з Украінай. Яна рашуча асуджае працяглую вайну ва Украіне і яе разбуральныя наступствы. IHF шчыра спадзяецца, што канфлікт хутка скончыцца, што адкрые шлях да вяртання да міру, аднаўлення нармальных спартыўных адносін і аднаўлення мірнага міжнароднага супрацоўніцтва".

Міжнародныя санкцыі на спартоўцаў Беларусі і Расіі былі накладзеныя пасля пачатку шырокамаштабнай агрэсіі, якую РФ развязала супраць Украіны ў лютым 2022 года.