Праз тры месяцы пасля вызвалення загінуў экс-палітвязень Аляксей Ляўкевіч
Аляксей Ляўкевіч / фота са старонкі "Вконтакте"
Загінуў 38-гадовы экс-палітвязень Аляксей Ляўкевіч, які выйшаў на волю тры месяцы таму. Прычынай гібелі стаў няшчасны выападак: мужчына патануў на возеры пры канцы чэрвеня, піша "Наша Ніва".
Ляўкевіч родам з Радашковічаў, але жыў у Бараўлянах. У 2011 годзе ён скончыў Беларускі дзяржаўны тэхналагічны ўніверсітэт. Займаўся ўкладкай пліткі і аздобнымі работамі.
Вялікую ўвагу Ляўкевіч надаваў спорту: шмат гадоў гуляў у аматарскі футбол і міні-футбол, выступаў у Прэм'ер-лізе 5х5 за каманды do-doma.by і "БелВЭБ", меў на сваім рахунку дзясяткі матчаў і галоў.
Пры канцы 2024-га Ляўкевіча арыштавалі і асудзілі па трох палітычных артыкулах — за абразу Лукашэнкі, распальванне варожасці і абразу прадстаўніка ўлады. Таксама яго ўнеслі ў "спіс тэрарыстаў".
Ляўкевіча вызвалілі ў ліку 250 палітвязняў сёлета 23 сакавіка пасля чарговага візіту Джона Коўла. Яму дазволілі застацца ў Беларусі. У красавіку ён нават паспеў згуляць за сваю міні-футбольную каманду.
