"Навошта Польшча, калі ёсць Эстонія?". Эксперт — пра мэту гібрыднай атакі Расіі

Разведка ЗША лічыць, што ў бліжэйшыя месяцы Расія можа зладзіць узброеную правакацыю супраць Польшчы. Існуе некалькі верагодных сцэнарыяў, і адзін з іх — з удзелам беларускіх салдат.

Ваенны эксперт, аглядальнік групы "Інфармацыйны супраціў", Аляксандр Каваленка лічыць, што ў першую чаргу пад пагрозай знаходзіцца Эстонія. У каментары для Еўрарадыё ён растлумачыў, чаму менавіта гэта краіна зараз найбольш уразлівая і якім можа быць адказ НАТА на гібрыдную атаку Расіі.

— Я думаю, што Расія можа пайсці на розныя гібрыдныя сцэнарыі, аднак тут важна разумець наступнае. На тэрыторыі Калінінградскай вобласці або на тэрыторыі Беларусі на сённяшні дзень не назіраецца засяроджання якога-небудзь буйнога ўдарнага кулака расійскіх войскаў. Напрыклад, калі разглядаць Калінінградскую вобласць, то там знаходзіцца прыкладна да 30 тысяч расійскіх ваеннаслужачых, з якіх ад 14 да 18 тысяч — гэта сухапутныя войскі. Гэта значыць, такая колькасць не ўяўляе пагрозы для Польшчы ў выглядзе маштабнай агульнавайсковай аперацыі, — сцвярджае Каваленка.

У Беларусі таксама няма неабходных для атакі на НАТА сіл, упэўнены эксперт.

— На тэрыторыі Беларусі расійскіх войскаў знаходзіцца прыкладна каля двух тысяч чалавек пры наяўнасці 14,5 тысячы беларускіх ваеннаслужачых. Аднак наўрад ці Лукашэнка будзе ўдзельнічаць у агрэсіі супраць краін НАТА, паколькі гэта фактычна стане канцом існавання яго рэжыму. Як вайна супраць Украіны, так і вайна супраць НАТА для яго азначаюць аднолькавы вынік, — лічыць Каваленка.

Нават калі разглядаць гібрыдныя аперацыі, узнікае пытанне: што будзе, калі Польшча сапраўды расцэніць іх як акт агрэсіі? А як можа адрэагаваць НАТА?

— Польская армія колькасцю да 200 тысяч чалавек — гэта зусім не той праціўнік, з якім расійскі кантынгент у Калінінградскай вобласці мог бы спаборнічаць, — упэўнены ваенны эксперт.

— Таму, калі казаць непасрэдна пра пагрозу для Польшчы, такія сцэнарыі выглядаюць украй рызыкоўна. Што датычыцца залётаў дронаў, то гэта цалкам можна растлумачыць памылкай GPS-навігацыі і падобнымі прычынамі. Магчымы і сцэнарый з верталётам. Але як у такім выпадку павінна рэагаваць НАТА?

Калі гаворка ідзе пра праверку Альянсу на трываласць, то можна ўявіць сітуацыю, калі абмежаваны кантынгент, які не вядзе баявых дзеянняў, апынецца на тэрыторыі Польшчы нібыта з-за навігацыйнай памылкі. У такім выпадку НАТА не стане прымяняць Пяты артыкул. 

— І тут узнікае пытанне: навошта Польшча, калі ёсць Эстонія? Гэта найбольш уразлівы кірунак. Усходняя мяжа, кірункі на Нарву і Тарту — гэта фактычна адчыненыя вароты для дзвюх расійскіх агульнавайсковых армій. Гаворка ідзе пра Ленінградскую ваенную акругу і Пскоўскую вобласць. Фактычна магчымы падвойны ўдар з двух кірункаў — на Тарту і Нарву. Плюс Балтыка, Балтыйскае мора, паўночнае ўзбярэжжа Эстоніі і магчымасць высадкі дэсанту, — прадказвае Каваленка.

Атакаваўшы Эстонію, Расія адразу пачне шантажаваць Еўропу, каб тая спыніла дапамогу Украіне, упэўнены ваенны эксперт.

— Менавіта гэта сапраўды можа стаць шокавым фактарам для ўсёй Еўропы, які Расія здольная выкарыстаць для шантажу еўрапейскіх краін.

Для чаго ёй гэта патрэбна?

Каб дабіцца спынення дапамогі Украіне. Калі Расія пачне падобную інтэнсіўную інтэрвенцыю з захопам часткі тэрыторыі Эстоніі, яна створыць эфект шоку і панікі, пасля чаго адразу пачне шантажаваць Брусель: "Калі вы не хочаце, каб мы пайшлі далей — напрыклад, у кірунку Берліна, Бруселя або прарубілі Сувалкскі калідор, — спыняйце дапамогу Украіне, і мы спынімся на тых рубяжах, якія ўжо занялі".

Гэта значыць, падобны сцэнарый можа разглядацца Расіяй як апошні шанс хоць нейкім чынам дабіцца перамогі ў вайне супраць Украіны. Менавіта ў гэтым я бачу магчымую аснову для такой аперацыі, — падкрэслівае Аляксандр Каваленка.