У сталічным доме на Леніна, які пацярпеў падчас пажару, пачалі мантаваць часовы дах

У доме на вуліцы Леніна, 9 у Мінску, які пацярпеў падчас пажару, будаўнікі прыступілі да ўладкавання часовага даху. З будынка ўжо вывезена 715 кубічных метраў згарэлых і не падлеглых аднаўленню канструкцый, паведамляе "Мінск-Навіны".

Як паведаміў намеснік старшыні Мінгарвыканкама Аляксандр Чэрнікаў, расчыстка ад смецця выканана на 85 працэнтаў, на аб'екце задзейнічана каля 100 чалавек. 

Кампанія "Мінскрэмстрой" пачала ўзводзіць кроквы і навесы для абароны будынка ад ападкаў. 

Газа- і водазабеспячэнне адноўлена ва ўсіх пад'ездах дома.

"Зараз адна з мэт — узнавіць падачу электраэнергіі. У будынку замянілі кабельныя лініі, аўтаматычныя выключальнікі і адналілі шчытавыя прыстасаванні", — паведаміў дырэктар ЖКГ Ленінскага раёна Мінска Дзмітрый Елісееў. 

Паводле яго слоў, святло ўжо пададзена ў другім, трэцім і чацвёртым пад'ездах да трэцяга паверха, аналагічныя работы вядуцца ў першым пад'ездзе.

Елісееў удакладніў, што праз 14 дзён будуць складзены дэфектныя акты з пералікам пашкоджанняў у кватэрах. Гэты тэрмін неабходны, каб памяшканні прасохлі і можна было аб'ектыўна ацаніць шкоду.

Як расказаў Чарнікаў, паралельна вядзецца распрацоўка праектнай дакументацыі і папярэдні разлік матэрыялаў для ўзвядзення пастаяннага даху. 

Нагадаем, пажар на гарышчы дома на вуліцы Леніна адбыўся 28 чэрвеня, яго тушылі больш за 10 гадзін. Было задзейнічана 27 адзінак тэхнікі, у тым ліку спецыяльныя машыны. На месца пажару прыязджаў кіраўнік МНС Беларусі.